Ginpasakaan na sang kaso ang anay scout ranger angot sa pagpangluthang-patay sa Prk Kasagingan, Brgy Banago, Bacolod City sang Oktubre 9.
Sa interview sang Bombo Radyo Bacolod kay Police Captain Ramie Sayson, officer in charge sang Bacolod Police Station 3, ang suspect ang ginkilala nga si Nicko Sergs Porras, 31 anyos, residente sang Hacienda Teresita, Brgy Dos Hermanas, Talisay City.
Madumduman nga gintiro kag ginlagas pa ni Porras tubtob sa ginsudlan nga balay ang biktima nga si Mark Anthony Gayatao alyas Butoy, 41 anyos, residente sang Prk Progreso Village, Brgy Vista Alegre.
Una na nga gin-ako sang live-in partner ni Gayatao nga nagagamit sang droga ang biktima, kag masami sini nga kaupod si Porras sa lugar bangod dira sila nagatransaksyon, apang wala na gintumod kun ano nga sahi sang transaksyon.
Samtang bangod indi pwede magfile sang kaso ang live-in partner, samtang nagpamalibad man ang iloy, ang tiya sini nga si Mylene Panel, ang balay nga ila ginakadtuan sa lugar amo ang nagtindog nga complainant, samtang ang iya live-in partner naman ang witness.
Sa imbestigasyon, natukiban nga anay miyembro sang 12th Infantry Battalion sang Philippine Army ang suspect kag ini ang katapo sang first infantry division bilang scout ranger.
Ang anay suldado nga may ranggo nga private ang ginreklamo bangod sa slight physical injury sang Hulyo 29.
Samtang nagpadulong ang ila military officer sa Bacolod Police Station 3 para bawion ang iya government issue cal. 45 pistol, kaupod ang duha ka magazine, 39 rounds sang ammunition, kag 141 rounds sang 5.56mm.
Ini ang na-issuehan sang Dropped from Rolls (DFR) sang Hulyo 16, kag nadeklara Absent Without Leave (AWOL) sang Hulyo 26.
