Tatlo ka mga sachet sang suspected shabu kag isa ka unit sang cellphone kag charger ang nakumpiskar sa ginpatigayon nga greyhound operation sang Bureau of Jail Management and Penology – Negros Island Region sa male dormitory sang Negros Occidental District Jail sang Nobyembre 20.
Sa interview sang Bombo Radyo kay Jail Senior Inspector Atty. Juniven Umadhay, chief sang legal service section kag tagpamaba sang BJMP-NIR, nakuha ang nasambit nga mga kontrabando sa bed bank sang isa ka person deprived of liberty.
Apang bangud nga indi permanent ang mga PDLs nga nagatinir sa isa ka bed bank, ila pa ginatumod kag ginakumpirmar kun sin-o ang nagapanag-iya sang mga kontrabando.
Suno kay Umadhay, humalin sang Nobyembre 18 nga operasyon, madamo na sila sang mga cellphones nga nakumpiskar.
Sa karun, ginabantayan sang mga personnel ang Dormitory 16 tubtob Dormitory 21 bangud sang Nobyembre 18, sa Dorm 21 nakuha ang mga kontrabando samtang sa Dorm 16 naman nakumpiskar ang mga ini kahapon.
Suno sa tagpamaba, magapadayon ang ila mga operasyon kag regular ini nga patigayunon apang indi nila pag-ibuyagyag kun san-o.
