Arestado ang 20 anyos nga babayi matapos nga makuhaan sang illegal nga droga nga ginpalaman sa tinapay sang ini ang magbisita sa iya nobyo nga nakadetain sa Kabankalan City Police Station.
Sa interview sang Bombo Radyo Bacolod kay Police Captain Joelan Vinson, deputy chief of Police sa Kabankalan City Police Station, sa pagpatigayon sang frisking sa babayi, nakuha ang isa ka plastic sachet sang suspected shabu sa sulod sang ginkihad nga pandesal, nga nagserbe nga palaman.
Ang suspect ang magabisita sa nobyo sini nga naaresto sa drug buybust operation.
Ginalataw ni Vinson nga ginsugo sang priso ang iya nobya nga dal-an ini sang gamiton nga illegal nga droga.
Ang babayi ang wala naman sa monitoring sang kapulisan sa mga drug personalities.
Ini ang mangatubang sang kaso nga paglapas sa section 11 (possession) sang Republic Act 9165 ukon Comprehensive Dangerous Drugs Act of 2002.
Pahanumdom ni Vinson nga sila ang nagapatigayon gid sang frisking sa mga nagabisita agud malikawan ang pagpasulod sang mga illegal nga kontrabando, kag ginadumilian man bisan ang cellphone.
