Halos apat ka kilo nga Marijuana, suspected liquid marijuana kag suspected shabu, narecover sa drug buybust operation sa Manville Royale Subdivision, Barangay Tangub, Bacolod City.
Ang subject person ang ginkilala nga si Rolyn Caduhada alyas Mik-Mik, 24 anyos, single, wala sang trabaho kag residente sa Barangay 3, La Carlota City nga ginakabig high value individual.
Nadakpan man ang duha sini ka kaupod nga sanday French Tan, 25 anyos, single, therapist, residente sang Prk Mahimulaton, Brgy. Banago, Bacolod City kag Ryan Christian Alova, 25 anyos, single, estudyante kag residente sa Prk San Sebastian, Brgy. Sum-ag, Bacolod City.
Ang operasyon ang ginpatigayon sang City Drug Enforcement Unit sang Bacolod City Police Office (BCPO-CDEU) alas-10:45 kagab-i.
Narecover sa mga suspect ang lima ka sachet sang suspected shabu kalakip ang buybust item; tatlo ka bricks, apat ka pack kag isa ka self sealing plastic sachet sang suspected dried marijuana leaves; kag 17 ka cartridges nga naga-unod sang ginapatihan liquid marijuana.
Ang suspected shabu ang ginabanta nagabug-at sang 10 gramos nga nagabalor sang P68,000 samtang ang dried marijuana leaves naman ang nagabug-at sang 3.8 kilos nga may standard drug price nga P456,000.
