Aminado ang commander sang Bacolod City Police Station 4 nga indi makabulig sa pagtumod sang mga suspetsado nga nagpatay kay Roberto Tan ang nakuha nila nga CCTV footage.
Sa karon, nagapadayon pa ang imbestigasyon sang kapulisan tuhoy sa pagpatay sa utod sang anay konsehal sa ciudad sang Bacolod sa CL Montelibano Avenue, Greens Ville 1, Brgy. Estefania, Domingo sang aga.
Madumduman nga ang biktima nga si Roberto “Kaisek” Tan sang Doña Aurora, Brgy. Villamonte, Bacolod City kag utod ni anay Councilor Ricardo “Cano” Tan ang sakay sa Nissan Sentra sang ini ang gintiro sang riding-in-tandem suspects.
Sa interview sang Bombo Radyo kay Police Major Reynante Jomocan, commander sang Bacolod City Police Station 4, ginpahayag sini nga may yara sila sang nakuha nga CCTV footage apang nagatalikod ang mga suspetsado kag indi kitaon ang ila nawong.
Suno kay Jomocan, isa sa ila nga problema ang kahadlok sang mga witness nga maghambal apang nagalaom ini nga makahatag sila sa gihapon sang impormasyon.
Ginpahayag man sang commander nga wala nagakooperar ang pamilya sang biktima.
Ginkompirmar man sini nga may yara sila sang ginpatukod nga task force nga magatutok sa nasambit nga kaso.
Nagpasalig man ini nga ginaubra nila sa gihapon ang ila nga masarangan agud masolbar ini kag ginakonsiderar nila ang tanan nga anggulo tuhoy sa motibo sa krimen.
