Napasakaan na sang criminal complaint ang gina-alegar nga suspek nga naghimulos sa 13 anyos nga Grade 8 student sa Barangay Taculing, Bacolod City.
Ang suspetado nga ginkilala pa lamang kay Robert ang nahibaluan nga kaingod balay kag abyan sang amay sang biktima.
Gina-alegar man nga nagagamit sang illegal nga droga ang suspetsado.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 6, may yara na sang nakita nga probable cause sa pagpasaka sang criminal complaint batok sa suspek.
Suno diri, kaupod sang amay ang bata sini padulong sa hall of justice kun sa diin yara man didto ang suspetsado para mahatagan man ini sang tsansa nga masugid ang iya bahin, samtang ginalikawan nga magkitaay sila sang biktima nga natrauma bangod sa natabo.
Nagpasalig naman si Santillan nga yara sa maayo nga kahimtangan ang biktima nga indi na sini pag-isambit pa ang iban nga impormasyon para sa safety sang bata.
Dugang pa ni Santillan, kun makita nga mabakod ang ebidensya batok sa suspetsado, igasiguro sini nga mahatagan sang hustisya ang biktima.
Sa karun ang suspetsado ang nakahunong sa Bacolod Police Station 6 nga suno kay Santillan sila magapatigayon sang bakground check sa identity sang suspek.
