Patay ang isa ka lalaki matapos mabun-an kasunod sang nagluntad nga kinagamo bangud sa gina-alegar nga pagsinuya-ay sa dalan Lacson, Barangay Mandalagan, Bacolod City, kahapon sang kaagahon.
Ang biktima ginkilala nga si alyas-Yuri kag residente sang Talisay City samtang ang ginapahayag nga suspek nga nakilala sang mga witness ang residente sang Bacolod City.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, ginapreparar na sa karun sang mga kapulisan ang mga dokyumento sa pagpasaka sang reklamo batok sa suspek nga positibo nga natumod sang mga witness bangud sa dala nga kutsilyo.
Suno kay Tapang, ginpahayag sang mga witnesses nga may yara pa sang tatlo nga kaupod ang nakil-an nga suspetsado.
Suno sa station commander, homicide ang ipasaka nga kaso sa suspek bangud wala man sang intensyon ang mga ini nga patyon ang biktima kag ang natabo ang ramble nga nagresulta sa pagpamuno.
Sa karun padayon pa nga ginapangita ang suspek nga nagbuno sa napatay nga biktima.
