Ginapreparar na ang pagpasaka sang kaso nga murder kag pagbayolar sa gun ban batok sa 47 anyos nga suspetsado nga nagluthang patay sa 24 anyos sa Purok Narra, Barangay Lopez Jaena, Murcia, Negros Occidental kagab-i.
Ginkilala ang biktima kay Edgar Tabunoc Jr., 24 anyos samtang ang suspetsado ang ginkilala kay Arman Lanerez, 47 anyos, kasado, driver kag residente sang nasambit nga lugar.
Sa interview sang Bombo Radyo Bacolod kay Police Captain Honey Labaro, Deputy Chief of Police sang Murcia Municipal Police Station, nagasakay sa tricycle si Tabunoc kaupod ang iya pamilya apang sang naglabay ini sa atubang sang balay ni Lanerez, kun sa diin gulpiyada lang ginbutong ni Lanerez si Tabunoc kag didto na nag-umpisa ang komosyon sa tunga sang duha ka pamilya.
Gintiro ni Lanerez si Tabunoc sang tatlo ka beses nga gintunaan sang kamatayon sini.
Ginalantaw sa karun nga personal grudge ang rason sa nagluntad nga insidente bangod ginpabrgy sang pamilya sang biktima ang pamilya ni Lanerez sa reklamo nga pagbutang sang basura sa dalan.
Suno kay Labaro, ginapreparar na ang mga dokumento sa pagfile sang kaso nga murder in relation sa COMELEC gun ban.
Samtang, ang utod ni Tabunoc ang gindala sa ospital bangod sa pilas sa ulo matapos nga ginlampusan kag may gindala man sa ospital sa bahin sang pamilya Lanerez matapos mapilasan sa nagluntad nga komosyon.
