Padayon ang imbestigasyon sa pagtumod sa suspetsado sa pagpatay sa 30 anyos nga lalaki sa Purok Lampirong, Brgy 2, Bacolod City, kahapon sang aga.
Ginkilala ang biktima nga si Aljune Baticados alyas ‘Malic’, 30 anyos, wala sang trabaho, kag residente sang Purok Masagana, Brgy 6, Bacolod City.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, nagapangita pa ang mga ini sang mga available nga CCTV footages sa area samtang nagapati man ini nga madamo sang nakawitness sa natabo apang nahadlok lamang magpanugid.
Kahapon, nagapanglakaton si Baticados sa bahin sang BREDCO port sang may nag-abot nga lalaki nga nagasuksok sang itom nga jacket, may tabon ang nawong, kag nagasakay sa itom nga motorsiklo.
Nahimo pa nga manago ni Baticados sa mga dalagko nga truck sa area apang siya ang nakita sang suspek.
Gintinguhaan man sini nga malagyo apang nalagas sa gihapon sang suspek kag amo na nga gintiro.
Suno kay Tolentino, may yara sang record sa ila estasyon si Baticados sa kaso nga illegal gambling kag nagpahayag ang pamilya sini nga nagagamit sang illegal nga druga ang biktima.
Samtang, masami man nga nagapangawat ang biktima sa mga truck nga yara sa BREDCO port apang wala sang may nagcomplain angot diri bangod nga ginapatihan nga may yara ini sang deperensya sa paminsaron.
