Temporaryo nga ginrelease ang suspek sa pagbuno-patay sa 18 anyos nga lalaki sa Barangay Mandalagan, Bacolod City, matapos nga makapyansa.
Madumduman nga napatay si Hikaru “Yuri” Legaste, 18 anyos, residente sang Barangay Efegenio Lizares, Talisay City, matapos mabuno ni Adrian Cagayao sang makaduha ka beses.
Ini ang resulta sang pagsuyaay nga nagdangat sa rambol, kun sa diin si Cagayao ang una na nga nagsungka sa Bacolod City Police Office kag ginturn-over sa kustodiya sang Bacolod Police Station 3.
Apang magluwas kay Cagayao, kaupod man nga ginpasakaan sang kaso nga homicide ang tatlo pa sini ka kaupod.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, may identity na sila sa tatlo man ka kaupod ni Cagayaon nga sa karun wala pa nakapalapit sa kapulisan.
Suno diri, homicide ang kaso nga ginpasaka kay Cagayao kag ini man ang kaso nga ginpasaka sa tatlo pa gid ka iban pa.
