(c) Victorias PNP
Naaresto na ang suspek nga nag-patay sa 7 anyos nga bata nga babaye sa syudad sang Victorias probinsya sang Negros Occidental nga nasapwan sadtong Dominggo sang gab-i.
Pasado las-5:00 kahapon sang hapon sang nadakpan ang suspek nga si Mark Besa sa banwa sang Ajuy sa probinsya sang Iloilo.
Sa exclusive interview sang Bombo Radyo Bacolod kay Police Major Eduardo Corpuz, hepe sang Victorias City Police Station, nadakpan ang suspek nga si Besa paagi sa gintingob nga pwersa sang Barotac Viejo kag Ajuy Municipal Police Station.
Suno naman kay Police Captain Joy Ellaga, deputy station commander sang Victorias PNP, kahapon las-2:00 sang kagaahon sang nakaabot sa Sitio Luyo, Barangay San Roque banwa sang Barotac Viejo ang suspek paagi sa pagsakay sini sa isa ka pumpboat nga iya ginkawat sa port sa Barangay 6A sa Victorias, kag sang naagahan na, iya gin-baligya ang krudo sang pumpboat sa balor nga P1,600 kag nagkadto sa iya himata sa Barangay Pili banwa sang Ajuy.
Bangud sini, nag-alarma ang mga pumuluyo sa Barangay 6A nga may nadula nga pumpboat kag nakumpirmar nga nakit-an ini sa Barotac Viejo.
Sang nag-padulong na sa nasambit nga banwa ang tropa sang Victorias PNP agud imbestigaran kuntani ang natabo nga pag-pangawat, nakabaton sila sang impormasyon nga yara sa Ajuy ang suspek nga si Besa kag ini ang nag-positibo.
Natabuan naman nga yara sa syudad sang Iloilo ang tanan nga hepe sa bug-os nga rehiyon 6, sa diin gilayon nakighinun-anon kag nag-pangayo sang bulig ang hepe sang Victorias PNP nga si Police Major Corpuz sa hepe sang Barotac Viejo Police Station nga si Police Major Joeven Arevalo kag kay Police Major John Van Herson Luspo sang Ajuy Police Station agud madakpan ang suspek.
Bangud sa pag-binuligay sang tatlo ka istasyon, gilayon nga nadakpan si Besa sa kasagingan sa Barangay Pili, Ajuy.
Matapos sini, gin-biyahe pabalik si Besa sa syudad kag pasado las-10:00 na kagab-i sang maga-dungka kuntani sa Barangay 6A ang pumpboat nga ila ginsakyan, apang ginlikaw sang mga kapulisan ang ila gin-dungkaan para naman sa seguridad sang suspek bangud sa kadamuon sang mga pumuluyo nga nag-bantay sa iya sa port sa diin nag-dungka na lang sila sa Litib-Litib Barangay 3 sa syudad sang Victorias gikan sa banwa sang Ajuy.
