Napasakaan na sang kaso nga double murder ang suspect nga nagbuno-patay sa mag-amay sa Purok Bawug, Barangay Camindangan, Sipalay City sang Huwebes.
Ginkilala ang amay nga si alyas “Molong”, 60-anyos, kasado samtang ang bata sini ang ginkilala nga si alyas “Ar-ar”, 35-anyos, lalaki, lunsay mga mangunguma kag resident sang nasambit nga lugar.
Samtang ang suspect nga hinablos ni Molong ang ginkilala nga si alyas “Rene”, 57-anyos nga residente sang nasambit nga lugar.
Sa interview sang Bombo Radyo kay PLt Col. Robelito Mariano, Acting Chief of Police sang Sipalay City Police Station, samtang yara sa sulod sang ila balay ang mag-amay, hinali lang nga nag-sulod ang suspect nga yara sa impluwensiya sang makahulubog nga ilimnon kag una nga ginbuno si Molong.
Na-igo ini sa nawala nga bahin sang iya dughan nga nagresulta sang iya kamatayon.
Kasunod sini, ginbuno man ni Rene si Ar-ar kag na-igo sa nawala nga bahin sang iya tiyan.
Ginhingagaw pa ini dala sa ospital apang ginbawian man sang kabuhi.
Suno kay Marian, ang suspect ang hinablos ni Molong kag sila ang tupad balay lamang.
Santo sa pahayag sang suspect, ginasakit siya sang iya tiyo gani nahimo niya ang krimen.
Pahayag ni Marian, sang Lunes napasakaan na sang kaso nga double murder si Rene paagi sa inquest proceedings.
Nakahunong ini karun sa Sipalay City Police Station.
