Ginpasakaan na sang kaso nga Frustrated Murder ang suspetsado sa pagbuno sa 51 anyos nga Barangay Health Worker (BHW) sa Crossing Marabo, Barangay Mambaroto, Sipalay City sang Huwebes.
Ang biktima ang ginkilala kay Elsa Claridad samtang ang suspetsado naman ang ginkilala nga si Pablito Morales Jr., 24-anyos kag lunsay residente sang Purok Lubi, Barangay Mambaroto.
Suno kay P/Maj. James Latayon, hepe sa Sipalay City Police Station, nagpangakig ang suspetsado bangod wala nadala ang pangalan sang iya amay sa listahan sang mga partially damaged ang balay bangod sa bagyo Odette nga makabatun sang financial assistance.
Sa imbestigasyon sang kapulisan, sang papauli ang BHW kaupod ang iban pa nga Barangay Workers sa Crossing Marabo, hinali nalang ini nga ginbantayan kag ginbuno sang suspetsado gamit ang screw driver.Ang biktima ang gindala sa Sipalay City Infirmary apang ginsaylo sa Corazon Locsin Montelibano Memorial Regional Hospital para sa nagakaigo nga pagbulong.
Samtang ang suspetsado ang nakahunong na sa kustodiya sang Sipalay City Police Station.
Suno kay Latayon, indi assign sa mismo nga paglista sang mga benepisyaryo ang biktima kag ini ng isa sa mga facilitator nga ginbutang para sa ila nga purok.
Ginpaidalum na sa inquest proceedings ang ginpasaka nga kaso nga frustrated murder.
