Nadakpan na ang suspect sa pagpamuno-patay sa Brgy Singcang Airport, Bacolod City sang Setyembre 23, matapos magpalupok sang armas luthang sa runway sang Old Bacolod Airport nga sakop sang Barangay Tangub, Bacolod City.
Madumduman nga si Alyas Parcon, 45 anyos, manug-lechon, amo ang gintudlo nga suspect sa pagbuno-patay kay alysa John Paul, 34 anyos.
Love triangle naman ang ginalantaw motibo sa pagpatay, bangod ang live-in partner ni John Paul ang anay kahagugma ni Parcon.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, sadto nagpatigayon sila sang hot pursuit operation agud dakpon si Parcon apang ini ang wala makit-an.
Sang Domingo, may-ara sang nagcontact sa ila hotline kag ginreport nga may lalaki nga nagapalupok sang armas-luthang sa runway sang old Bacolod airport.
Natabuan man nga malapit lang sa area ang ila motorcycle patrol, kag gilayon nga nakaresponder.
Naabtan nila sa akto si Parcon nga bitbit ang cal. 38 revolver.
Bangod nakibot ini sa madasig nga pagresponder sang kapulisan, wala na nagbato pa si Parcon kag natigayon nga maaresto.
Ini ang nakahunong na sa Bacolod Police Station 8, kag mangatubang sang kaso sa paglapas sa illegal discharge of firearms in relation sa Republic Act 10591 ukon Comprehensive Firearms and Ammunition Regulations Act.
Ginpasaka naman nila ang kaso nga murder batok sa suspetsado.
