Padayon pa nga ginapangita ang duha ka mga suspetsado sa insidente sang pagpanghold-up sa atubangan sang isa ka tindahan sa Abada Street, Barangay Inayawan, Cauayan, Negros Occidental.
Suno kay Police Major Roberto Indiape, hepe sang Cauayan Municipal Police Station, nagpablotter sa ila estasyon ang biktima nga si Eugene Estacion, 50 anyos, residente sang Barangay Punta Taytay, Bacolod City kag isa ka sales agent sang Bacolod Columbia Marketing Incorporated (BCMI), kaupod si Ernie Zambra, territory manager sang BCMI.
Suno kay Indiape, natabo ang insidente sang si Estacion, kaupod ang driver nga si Gilbert De-ita kag duha ka mga helpers nga sanday Dexter Malo kag Godfrey Duena ang nagdeliver sang pila ka mga items sa Elena Store sang nagpalapit sa mga ini ang duha ka mga lalaki nga nagasuksok sang kalo kag facemask.
Hinali lamang nga ginhablot sang isa ka sling bag sang biktima, gintayaan sila sang pusil kag nagdeklarar nga hold-up.
Nagkuha naman sang armas-luthang ang isa pa gid kag lalaki kag gintaya kay Estacion.
Gilayon ang mga ini nga nagpalagyo sa direksyon padulong sa Sipalay City gamit ang isa ka motorsiklo.
Suno sa hepe, sang tinalikdan nga tuig nahold-up naman ang biktima kag ginalantaw sini nga ang suspetsado sadto amu man ang suspetsado sa karun nga insidente.
