Duha ka anggulo ang ginalantaw sang Bacolod City Police Station 4 nga motibo sa pagbun-anay sang maglive-in partner sa Purok Hervias 2, Barangay Villamonte, Bacolod City kagab-i.
Suno kay Police Major Jun Ray Batadlan, commander sang Bacolod Police Station 4, ang suspek nga si Lyndon Dinawanao ang nagapabilin sa Corazon Locsin Montelibano Memorial Regional Hospital (CLMMRH) nga nagapaayo matapos nga gin-operahan ini bangud nakaangkon sang tatlo ka buno sa tiyan.
Suno kay Batadlan, ginalantaw nila nga self-inflicted ang pilas nga naangkon sang biktima.
Ginpahayag sang hepe nga intentional ang pagbuno sa biktima nga si Mary Ann Tamonan bangud lima ka pilas ang naangkon sini, duha sa likod, duha sa tiyan kag isa sa dughan.
Suno kay Batadlan, ang pilas sang biktima ang nagapakita nga may kainit ang suspetsado sa iya.
Isa sa mga rason sang madugay nga pag-inaway sang magkahagugma ang pagparecord ni Tamonan sadtong Oktubre 2020 kaupod ang dose anyos nga anak nga babayi sa anay karelasyon may kaangtanan sa acts of lasciviousness batok sa ka-live in bangud nagpanugid ang bata nga ginamolestyahan ini sang suspetsado apang wala maestablisyar kun ginpadayon ni Tamonan ang pagpasaka sang kaso batok kay Dinawanao.
Kasunod sang natabo, nagbulagay ang duha sa sulod sang pila ka bulan apang Abril subong nga tuig kag liwat nga nag-upod si Tamonan kag Dinawanao.
Suno kay Batadlan, isa man sa rason amo ang pagpangimon sang suspek sang biktima.
Antes natabo ang insidente kagab-i, si Tamonan ang nagikan sa iya utod.
Suno sa witness, pagkatapos sang pagbuno sang suspek sa biktima, ginbuno man sini ang kaugalingon.
Nakuha man nila sa crime scene ang duha ka kutsilyo kag isa diri ang nagalaba sang 12 inches.
May ginauyatan man nga kutsilyo ang biktima nga ginalantaw sang otoridad nga gingamit pangdepensa sa kaugalingon sini.
Lunsay naman nga nakainom ang duha sang makahulubog nga ilimnon suno sa responder nga una nga nagresponde sa crime scene.
Ginpahayag man sang hepe nga wala man maayo ginasapak sang pamilya ang suspetsado bangud ginapahayag nga may kalain man sang buot diri.
Wala pa naistorya sang mga otoridad ang pamilya sang biktima sa suspetsado.
