Nagsungka na sa Bacolod Police Station 7 ang ginatudlo nga nagtiro-patay sa 36 anyos nga panday sa Abada Escay, Barangay Vista Alegre, Bacolod City sang Domingo, apang hugot sini nga ginapanginwala ang alegasyon.
Madumduman nga ang biktima ang ginkilala kay Edgar John Mendoza samtang ang ginatudlo naman nga suspect amo ang kaingod sini nga si Darryl Daza.
Si Mendoza ang nakaangkon sang duha ka igo sang bala sa guya nga gintunaan sang iya gilayon nga kamatayon.
Sa interview sang Bombo Radyo Bacolod sa gina-alegar suspetsado nga si Darryl Daza, hugot sini nga ginpanginwala ang kahilabtanan sa krimen.
Panindugan niya nga paga-atubangon sini kun ano man ang ipasaka nga kaso batok sa iya, apang nagapati man ini nga mapamatud-an sa imbestigasyon nga wala ini sang sala.
Pahayag niya nga ang alegasyon nga siya ang nagluthang sa biktima ang bangod lang sa nagalapta nga kutso-kutso ilabi na nga may daan nga hiligut-anon sa ila nga duha.
Ginsaysay sini nga nag-umpisa ang ila indi pag-intindihanay sang ginbato sini ang atop sang balay sang ugangan ni Mendoza.
Paathag ni Daza nga ginatsismis siya sang ugangan sang biktima kag siya ang ginapakamalain gani ginbato niya ang nasambit nga balay.
Dugang pa sini nga wala man nagreact ang ugangan ni Mendoza sa iya nga ginbuhat bangod aminado man ini nga may sala sa iya.
Apang sang gab-i, ginsita siya ni Mendoza tuhoy sa paghaboy sang bato kag nagdepensa man ini nga nag-aregluhanay na sila sang ugangan sang biktima.
Apang ginalantaw sini nga mahimo nagdumot sa iya si Mendoza gani ginasaskuhan siya sini kun sa diin ginahabuyan sang biktima sang botelya sang softdrink kag square bar ang iya nga ginatulugan.
Paathag ni Daza nga bangod sa nangin komosyon nila, gani nagalapta ang kutso-kutso nga mahimo siya ang nagpatay diri sang Domingo.
Hingyo sang gina-alegar nga suspetsado nga antes ini itudlo nga may kahimuan sang krimen, seguruhon anay ang kamatuoran bangod paathag sini nga siya ang wala sang ginhimo nga sala. Samtang, nagbag-o ang pinsar sang suspetsado sa pagpatay sa panday sa Abada Escay, Barangay Vista Alegre, Bacolod City sang Domingo kun sa diin imbes nga akuon kuntani ang krimen, nagpanginwala na ini sa pagpatay sang magpalapit sa Bacolod Police Station 7.
Sa interview sang Bombo Radyo Bacolod kay P/Capt. Elmer Bonilla, station commander sang Bacolod Police Station 7, kapin alas-10:00 sang aga sang nagpadulong sa ila estasyon si Darryl Daza upod sa iya pakaisa.
Pahayag sang station commander nga gintuad sang pakaisa sang gina-alegar suspetsado nga antes sila magpadulong sa Police Station, ang plano ni Daza amo ang magsungka sa kapulisan agud akuon ang pagluthang sa biktima nga ginkilala kay Edgar John Mendoza.
Apang pagdangat na sa Police Station 7, hugot na sini nga ginpanginwala nga siya ang may kahimuan sa krimen.
Paathag sini nga mahimo subong nga adlaw mafile na ang kaso nga Murder sa suspetsado.
Pahayag ni Bonilla, nga ginkumbinsir man nila ang suspetsado nga mag-ako kun siya ang nagbuhat sang krimen apang hugot ini nga nagapanginwala sa alegasyon.
Suno sa station commander, si Daza ang duha man ka tuig nga napriso sa Bureau of Jail Management and Penology (BJMP) sadto bangod sa kaso nga pagpangawat.
Aminado man ang mga himata sini nga ang suspetsado ang nagagamit sang iligal nga droga.
