Padayon sa gihapon ang imbestigasyon sang Bacolod Police Station 7 sa pagtumod sa suspek sa shooting incident nga nagluntad sa Purok Metal, Barangay Alijis, Bacolod City, sang Enero 24.
Ang biktima amo sanday Paul John Montaño nga isa ka anay job order sa ciudad nga nakaassign sa Bacolod Traffic Authority Office (BTAO) apang sa barangay naga-duty, kag patay man ang ginapahayag nga menor de edad nga kaupod sini.
Sa interview sang Bombo Radyo Bacolod kay Police Captain Andy Ofalia, station commander sang police station 7, ang biktima nga si Montaño ang madamo sang kaso sa police station 7 kag imbulbado sa firearms kun sa diin ini ang may gintiro man sadto kag ginpahayag nga kilala man nga siga sa area sang station 7.
Suno kay Ofalia, ang bata nga isa sa biktima ang nagaupod-upod kay Montaño bangud anak man ini sang iya nga abyan.
Ginalantaw nga pagdumot ang motibo sa krimen matapos nagwa sa pagpangusisa sang otoridad nga si Montaño ang may record man nga kaso sang pagpangluthang, pagpanaya, papamahog kag pagpangkastigo.
Sa karun, ginalauman nga kun tani may yara sang witness nga makahatag sang impormasyon agud maahatagan sang hustisya ang mga biktima.
