Napasakaan na sang kaso ang gina-alegar nga commercial sex worker nga nagbuno sa manicurista nga naga-bugaw sa iya sa Bacolod City Public Plaza.
Madumduman nga sang Setyembre 17, ginbawian sang kabuhi ang manicurista nga si Annie Pula, 51 anyos nga nagapwesto sa plaza matapos nga ginbuno ni Joan Nabe, nga naga-edad sang 35 anyos.
Una na nga nakabaton sang pagpamahog si Annie Pula antes pa man natabo ang pagpatay sa iya.
Ginbuno ni Nabe ang biktima kag ini ang gilayon nga nalagyo.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1, kahapon natigayon nga mapasaka ang kaso nga murder batok sa suspetsado. Samtang, may gindeploy na nga police personnel ang Bacolod Police Station 1 sa Bacolod Public Plaza agud nga magbulig sa Public Order and Safety Office (POSO) guards nga yara didto nakaduty.
Sa interview sang Bombo Radyo Bacolod kay Police Major Elmer Bonilla, antes pa man natabo ang insidente sang pagpamuno sa isa manicurista, may yara na sang personnel ang Bacolod Police Station 1 nga gindeploy sa plaza para sa Oplan Sita.
Suno kay Bonilla may yara na sang dedicated nga personnel nga ideploy sa aga kag gab-i agud nga magbulig sa POSO guards sa pagbantay sang seguridad sang plaza.
Ini man ang kasunod sang mando sang Bacolod City Police Office City Director matapos nga nagluntad ang wala ginlauman nga insidente kag nagrequest man sang uniformed personnel ang POSO guards bangud nagakinahanglan sila sang assistance.
Suno sa station commander, pagabantayan man sang mga kapulisan kag POSO guards ang mga commercial sex workers nga indi na magtinir sa public plaza agud malikawan na nga maliwat ang insidente.
Ginpahayag man sini nga ang pagpabilin sang seguridad ang indi lamang obligasyon sang mga kapulisan kag POSO guards kundi nagakinahanglan man ini sang kooperasyon sang publiko.
