Parehas nga nagpablotter sa Bacolod Police Station 2 ang pumuluyo sa Barangay 7, Bacolod City nga ginlampusan sang tubo kasubong man ang naglampos nga si suspended Barangay Kagawad Bernabe Sibug.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, ang biktima nga si Paolo Jarobel, 37-anyos kag suspended Barangay Kagawad Sibug ang ginpanugyanan sini nga mag-atubangay danay kag isettle ang problema sa Barangay.
Samtang kun wala sang settlement nga matabo, yara sa ila ang option sa pagpasaka sang kaso.
Madumduman nga sa una nga paghinun-anon sang Bombo Radyo Bacolod kay Jarobel, ginpahayag sini nga sang siya ang maglabay sa balay ni Sibug, siya ang ginsita sang suspended Barangay Kagawad sang “Maano ka, isog kagid haw? hapos ka lang patyon” kag nakasabat man ini nga “Maano ka man haw?.”
Dugang pa sini nga sila ang nagbaisay tubtob nga gintambagan ni suspended Punong Barangay Hersy Sibug nga amo ang nagpanagyo sang pasaylo kay Jarobel.
Apang ang suspended Barangay Kagawad ang nagkuha sang tubo kag siya ang ginlampusan, nga nakuhaan man sang CCTV footage.
Sa pihak nga bahin, sa blotter report ni Sibug, ginpahayag ni Tolentino nga ginapanindugan sini nga siya ang ginsinggitan ni Jarobel sang “Maano ka?” sang maglabay sa ila balay.
Ini ang kaangay nga nagapabati-bati pa nga nagresulta sa ila nga paglalisay.
Suno diri, nakita niya nga nagkuha sang kutsilyo si Jarobel sa tool box sang motorsiklo nga amo ang nagtrigger agud siya ang magkuha man sang tubo kag gin-unahan ang biktima.
Ginapakamaayo na lamang nga yara man ang pakaisa ni Jarobel nga amo ang nag-agaw sang tubo sa mga kamot ni suspended Barangay Kagawad Sibug.
