May pagpanghangkat si suspended Negros Oriental 3rd District Congressman Arnolfo Teves sa Senado, mga kongresista kalakip na si President Ferdinand ‘Bongbong’ Marcos Jr. paagi sa ginpagwa sini nga statement nga gintutukan kag ginpahog ang iya mga tawo sa Negros Oriental.
Suno kay Teves, siya ang nakabaton sang tawag gikan sa iya mga tinawo nga sila ang gintutukan sang armas-luthang sang mga persona nga nagasakay sa kotse nga nagamonitor sa iya balay.
Suno diri, isa sa iya tinawo ang nagalakat lang sa dalan apang ginpalapitan sang salakyan, ginbuksan sang bintana kag gintutukan sang armas-luthang.
Gintawag sini ang atensyon sang Philippine National Police, Criminal Investigation and Detection Group, National Bureau of Investigation kag Department of the Interior and Local Government Secretary Benjamin Abalos Jr, nga nagpasalig nga wala na sang gamo sa probinsya apang may yara pa sang nagapanutok sang armas-luthang nga nagtuga sang kahadlok sa iya mga tinawo.
Kasubong man nga naghingyo ini sa nagapanutok sang armas nga indi pagsundon ang ginsugo nga indi insakto.
Suno diri, sobra-sobra na ang ginahimo sa iya sang Marcos administration bangud daw kaangay na ini sang martial law.
