Magapadala sang komunikasyon si suspended Barangay 16 Punong Barangay Joseph Delos Santos sa pila ka mga talatapan sang gobyerno agud nga magpahibalo nga nakabalik na ini kag magatrabaho bilang Punong Barangay sang nasambit nga barangay.
Sa interview sang Bombo Radyo Bacolod kay Delos Santos, nagpanindugan ini nga magabalik liwat subong nga adlaw agud nga magtrabaho kag magapagwa man ini sang memorandum sa tanan nga mga pumuluyo sang Barangay 16 nga sa iya na magpapirma sang mga dokyumento kaangay sang Barangay Clearance.
Ginpahayag man sini nga mapadala man ini sang communication letter sa Department of the Interior and Local Government (DILG) Landbank, Commission on Audit, City Mayor kag Accounting sang syudad agud magpahibalo nga ini ang nakabalik na sa pagtrabaho bilang punong barangay epektibo kahapon, Agosto 7.
Wala man sini ginbaton ang suspension order bangud wala sang pirma ni Bacolod City Mayor Alfredo Benitez.
Hilway man ini nga manaog kun nabaton na sini ang suspension order nga ginpirmahan sang alkalde.
Nagapanindugan ang acting punong barangay sang Barangay 16 nga magapadayon ini pagtrabaho agud magserbe sang mga pumuluyo sa ila barangay santo man sa resolution nga gin-aprubahan sang Sangguniang Panlungsod.
Sa interview sang Bombo Radyo Bacolod kay acting Punong Barangay Stella Dela Pena, indi man makapangpirma si suspended Barangay 16 Punong Barangay Joseph Delos Santos sang mga dokyumento sang Barangay.
Suno kay Dela Pena, santo sa nauyatan sini nga pinakaulihi nga resolution nga gin-aprubahan sang Sangguniang Panlungsod nga suspended liwat si Delos Santos sang anum ka bulan.
Suno diri, magapadayon siya sa pagserbe sa mga pumuluyo sang Barangay 16.
Nasubuan man ini sa nagakatabo apang nagalaom ini nga makay-o man gilayon ang problema nga ginapangatubang sang Barangay 16.
