Makaligad ang masobra isa ka semana humalin sang natabo ang krimen, nadakpan na ang suspetsado nga naghimulos sa 13-anyos sa ciudad sang Cadiz.
Ang 23-anyos nga si Marlon Beboso Jr. sang Sitio Payawan, Cabiahan, Cadiz City ang nadakpan kagab-i sa ciudad sang Talisay matapos ginserbehan sang mga pulis sang warrant of arrest sa lain nga kaso nga ginapangatubang sang suspetsado.
Sa interview sang Bombo Radyo kay Police Major Jigger Gimeno, hepe sang Talisay City Police Station, may standing warrant of arrest si Beboso bangud sa kaso nga rape nga iya nakomiter sa Barotac Viejo, Iloilo kag ini ang gin-issue sang tuig 2017.
Kahapon, nakig-angot ang Cadiz City Police Station kanday Jimeno bangud natiktikan nga yara si Beboso sa Barangay Zone 3.
Sa mandu man ni Mayor Niel Lizares, nagbuligay ang mga pulis kag force multipliers agud mabantayan ang ginatiniran ni Beboso.
Naalarma ang suspetsado bangud sa presensya sang force multipliers gani nagbiya ini sa balay nga iya ginatiniran apang makaligad ang duha ka oras, nagbalik ini agud kuhaon ang iya bayo.
Sang nagsakay na sa tricycle, diri na ginlagas sang mga pulis si Beboso kag ginserbehan sang warrant of arrest.
Suno kay Jimeno, tatlo tubtub lima pa lang ka adlaw sa Talisay si Beboso nga naghimulos sa 13-anyos nga nagapakadto sa eskwelahan sa Cadiz sang Nobyembre 11.
Ginsapupo ini sang isa ka trisikad driver kag nagbyahe man siya sang trisikad antes nadakpan.
Santo sa impormasyon, si Beboso ang nakakomiter man sang rape sa Kabankalan City.
