Naaresto na ang suspek nga nagluthang-patay sa caretaker sang manokan sa sulod sang Team Juan Game Farm, Zone 5, Barangay Concepcion, Talisay City, kahapon sang aga.
Ginkilala ang biktima kay Felix Baylocon, 29 anyos, residente sang Hda. Mambucano, Barangay Cabatangan, Talisay City, kag temporaryo nagapuyo sa game farm.
Nagapangape ang biktima kaupod ang iya ka live-in sa atubang sang nippa hut sa sulod sang farm, sang hinali nga ginpalapitan sang lalaki nga nagasuksok sang itum nga tshirt kag short pants kag gintiro sang makapila ka beses ang biktima nga nagresulta sa kamatayon sini.
Sa interview sang Bombo Radyo Bacolod kay Police Major Wilfredo Benoman, Deputy Chief of Police sang Talisay City Police Station, ang suspetsado ang ginkilala nga si John Michael Mutia, 21 anyos, nagatrabaho bilang gwardiya sang isa ka buluthuan.
Suno diri, naaresto sa entrapment operation si Mutia sang ini ang nalagyo sa wala nahibaluan nga direksyon matapos sini nga ginhimo ang krimen.
Naaresto sa area nga sakop sang Bacolod Police Station 5 ang suspetsado.
Positibo naman nga nakilala ang suspek bangod man sa pag-identify sang witness nga amo ang live-in partner sang biktima.
Nakumpiskar sa suspek ang isa ka 38 calibre revolver kag apat ka live ammunition.
Apang, ginpanginwala naman sang suspek nga siya ang naghimo sang krimen.
Igapaidalum naman sa paraffin test ang suspek kasubong nga ipaidalum sa ballistic examination ang narekober nga armas-luthang.
Samtang, yara na sa kustodiya sang Talisay City Police Station ang suspetsado.
Nagapati ang Stepfather sang biktima nga na-trippan lamang ang manak sini nga ginpatay.
Sa interview sang Bombo Radyo kay Raul Bervedez, ang manak sini nga si Felix Baylocon, ang isa ka mabuot nga klase sang tawo kag suno diri, posible nga natrippan lamang ini sang suspek.
Ginpahayag man sini nga apat ka lupok ang iya nabatian samtang ang suspek naman ang indi sini makilala nga indi man residente sa ila lugar kag indi man ini masami nga makit-an didto.
