Ginpahayag sang pinuno sang Bacolod City Investigation and Detective Management Unit nga case closed na ang kaso sa pagpatay kay Nicus Balagusa.
Sa interview sang Bombo Radyo Bacolod kay Police Major Joery Puerto, kahapon sang aga napasaka na ang kaso nga rape batok sa duha ka suspetsado nga naghimulos sa 16 anyos nga menor de edad kag sang hapon naman napasaka ang kaso nga murder batok sa lima ka suspetsado nga nagpatay kay Nicus Balagusa kun sa diin nalakip sa mga suspetsado ang amay sang biktima nga ginrape nga amo si Carlito “Dondon” Tongho.
Suno diri ginahulat na lamang ang warrant of arrest kag kasunod diri amo ang pagpatigayon sang manhunt operation.
Mensahe ni Puerto, wala sang lugar ang krimen sa sosyodad kag ang paghimo sang sala may yara sang nagakaangay nga penalidad.
Samtang, sa isa ka CCTV footage nakita nga may isa ka lalaki nga gintapongol sang isa ka babayi sa bilyaran sa atubang sang balay ni Nicus Balagusa.
Sa video, nakita nga nagpalapit ang babayi kag hinali sini nga ginsakit ang lalaki.
Nakita nga gintampa, ginhampak sang bag, kag ginsipa sang babayi ang lalaki, apang ginklaro naman sang ginikanan ni Nicus nga lain nga lalaki ang ginsakit sang isa ka babayi kag indi ini ang ila bata.
