Natigayun na nga mapasakaan sang kaso ang ginatudlo nga suspect sa pagbuno-patay sa isa ka sulterito sa riot nga nagluntad sa atubang sang Bacolod City Government Center (BCGC) sa Barangay Villamonte, Bacolod City kagab-i.
Sa interview sang Bombo Radyo Bacolod kay Police Lt. Greeky Cayao, deputy station commander sang Bacolod City Police Station 4, kaso nga murder ang ginpasaka batok kay Jorebel Datulayta, 21 anyos kag residente sang Purok Pag-asa, Barangay Alijis, ciudad sang Bacolod.
Suno kay Cayao, natumod sang mga ini nga si Datulayta ang suspect nga nagbuno sa kay Joshua Torres sang Barangay 41, Bacolod City bangud ini ang gintudlo sang kaupod nga menor de edad sang biktima kasubong man sang duha ka Public Order and Safety Office (POSO) personnel sang syudad nga nagabantay sa Government Center.
Pahayag ni Cayao, magluwas nga may nagtudlo kay Datulayta nga ini ang suspetsado sa pagpamuno, may yara man sang nakita ang mga kapulisan nga mensahe sa group chat sang cellphone sang suspetsado nga nagasiling “diin na kamo may ginbuno na kami”.
Suno kay Cayao, gindala si Torres sa Corazon Locsin Montelibano Memorial Regional Hospital apang gindeklarar nga dead on arrival.
Magluwas diri, wasak man ang windshield sang isa ka jeep nga ginhalitan sang mga kabataan.
