Duha ka kaso ang ginpasaka batok sa suspetsado nga nagpatay sa nakabais niya sa parkingan sa gwa sang hardware sa Barangay Ma-ao syudad sang Bago sang Martes sang aga.
Sa interview sang Bombo Radyo Bacolod kay Police Senior Master Sergeant Job Ogares, chief investigator sang Bago City Police Station, napaidalom na sa inquest proceedings si Jonas Lohan Tobongbanua kag kaupod sini nga si Rene Jun Flores.
Suno kay Ogares, sa kaso nga murder ang complainant amo ang amay ni Ephraem kag Jomel Alinsuring bangud napatay sang suspek si Ephraem.
Samtang, sa frustrated murder naman ang complainant amo si Jomel bangud ginsipa ini ni Tobongbanua kag gintiro apang maswerte ini nga nakapalipod sa tricycle kag wala maigo.
Madumduman nga nag-umpisa ang krimen sa paglalisay ni Jomel Alinsuring, ang utod sang biktima nga si Ephraem Alinsuring, kag ang suspek nga si Jonas Lohan Tobongbanua bangud sa pagpark sang tricycle kun sa diin nauna si Jomel sa parkingan apang nag-una si Jonas sa pagplastar sang tricycle.
Kasunod naman nga nagbiya sa lugar si Tobongbanua kaupod ang iya hinablos nga si Rene Jun Flores nga amo ang nagmaneho sang motorsiklo.
Santo sa makita sa CCTV, nagbalik si Tobongbanua kag Flores sa atubang sang hardware makaligad ang tatlo ka minutos kun sa diin yara pa sa lugar ang mag-utod nga Alinsuring.
Gintindakan ni Tobongbanua si Jomel nga nagatalikod sa dalan gani nagtambag ang iya magulang nga si Ephraem.
Hinali nga naggabot sang armas-luthang si Tobongbanua nagikan sa iya nga hawak kag gintiro si Ephraem nga naigo sa tiyan.
Gintiro man sini si Jomel apang maswerte nga nakapalipod sa tricycle.
Sang nagpalagyo na si Jonas gintilawan man sang amay nanday Ephraem kag Jomel nga ini ang lagson apang wala nalab-ot.
Ginpahayag man sang chief investigator sang Bago City Police Station nga adlaw adlaw ang mga ini nagapatigayon sang checkpoint.
Nagapatigayon man ang kapulisan sang Bago City sang tokhang kontra armas luthang kag ginabisitahan man sang mga ini ang mga gunholders nga napaso na ang rehistro sang armas agud nga engganyuhon ang mga ini nga renewhon ang lisensya sang ila armas.
Wala man sang nabaton nga report ang Bago City Police Station nga may yara sang naglapas sa election gun ban.
