Nagapabilin sa balay-bululngan ang suspetsado sa pagluthang-patay sa iya kahagugma kag utod sini nga babayi sa Barangay Taculing, Bacolod City kahapon kag natalana nga operahan matapos makaagom sang pilas sa nawala nga dughan matapos iya ginbuno ang kaugalingon.
Sa interview sang Bombo Radyo Bacolod kay P/Capt. Elmer Bonilla, station commander sang Bacolod City Police Station 6, yara sa karun ang suspetsado nga si Alvin Lanza sa Corazon Locsin Montelibano Memorial Hospital (CLMMRH) kag natalana nga operahan sa dughan.
Nagagwa sa imbestigasyon nga ang rason sa pagpangluthang amo ang selos kag indi pagpabor sang pamilya sang biktima sa suspetsado.
Suno kay Bonilla, may nagapangaluyag sa nobya sini nga si Imee Mahilum.
Madumduman nga pauli na kuntani ang mag-utod sang ginapahayag nga nagsabtanay sila sang suspetsado.
Gintiro ni Lanza ang manghod nga si Aimee Jane Mahilum nga gilayon nga napatay kag iya ginsunod ang kahagugma nga si Imee Mahilum.
Matapos sini, nagdalagan si Lanza sa likod sang ila opisina kag ginbuno ang iya nawala nga dughan.
Ang 36 anyos nga si Mahilum ang nagatrabaho sa Accounting Department sang Toughstar Engineering Works nga nahamtang sa Lot 3, Block 14, Gonzaga Extension, Doña Juliana Subdivision, Barangay Taculing sa ciudad sang Bacolod kun diin natabo ang insidente.
Kaupod naman sini sa trabaho si Lanza nga isa ka driver-mechanic.
