Pasakaan na sang kaso nga murder subong nga adlaw si Carlito “Dondon” Tongho ang suspetsado sa pagluthang-patay sa Senior High School Student nga si Nicus Balagusa sa Granada Ville, Barangay Granada, Bacolod City sang Hunyo 2.
Sa interview sang Bombo Radyo Bacolod kay Police Major Joery Puerto, pinuno sa Bacolod City Investigation and Detective Management Unit, sa tion nga makadesisyon na ang korte kag makapagwa sang warrant of arrest, tinguhaan man nila nga makita si Tongho agud maserbe ang warrant of arrest.
Apisar nga si Tongho ang may-apat pa nga kaupdanan, ini lamang ang mapasakaan sang kaso bangod siya ang positibo nga nakilal-an sang mga witness.
Panugyan sini sa suspect nga magsungka na lamang kag isurrender ang gingamit nga armas luthang agud ma-iban ibanan pa ang iya sentensya.
Sa karun, wala pa sila sang nakita nga indikasyon sa pagsurrender sang suspect.
Panindugan ni Puerto nga iserbe nila ang hustisya sa biktima, ilabi na nga sa imbestigasyon natumod nga indi kabahin ang biktima sa mga naghimulos sa 16 anyos nga bata nga babayi sang suspect.
Samtang madumduman nga sa haya sang biktima, may natalupangdan man nga nagabalik-balik nga nakamotorsiklo kag sang ginpalapitan gilayon man nga nagpalagyo, gani nagakahangawa ang pamilya sang biktima sa ila safety.
Pasalig ni Puerto nga sila ang nagakoordinar sa Barangay agud may mahamtang nga mga Barangay Tanod nga magabantay sa seguridad sang pamilya kag ini ang dugay-dugay man nga ginatsekyar sang mga kapulisan.
