Mahimo nga magapangatubang sang kaso nga murder si Patrolman Alvin Rios nga nagpatay kay Police Staff Sergeant Jotham Aremtuto sang naabtan niya ang biktima sa ila mismo nga kwarto sa Barangay Tangub, ciudad sang Bacolod kahapon sang hapon.
Sa interview sang Bombo Radyo kay Police Major Eugene Tolentino, station commander sang Bacolod Police Sation 8, si Rios nga na-assign sa 1st Mobile Force Company sang Iloilo Police Provincial Office, ang masami nga nagatabok-tabok byahe para makita ang bata sini sa iya anay-karelasyon nga nagapuyo sa Barangay Tangub, Bacolod City, Negros Occidental.
Suno kay Tolentino, nakaligad nga gab-i yara didto nagtinir sa balay sang babayi si Rios apang kagab-i pag-abot sini sa balay, nakita sini sa sulod sang kwarto ang babayi kaupod si Aremtuto.
Sa pahayag sang babayi, pagsulod ni Rios sa kwarto, si Aremtuto nagahapa samtang siya naman ang nagapungko kag nagatext sa cellphone.
Nagbangon si Aremtuto nga naghambal pa nga “indi” kay Rios.
Apang, gilayon naman nga gintiro ni Rios si Aremtuto sa dughan sang duha ka beses.
Pag-abot sang kapulisan sa area, yara lamang didto si Rios nga ila gilayon nga gin-aresto.
Pahayag ni Tolentino, nakaa-agi na nga nagpalapit sa Police Station 8 ang babayi bangod nga luyag sini nga I-settle nga wala na sila ni Rios kag indi na sini luyag nga magkadto pa sa balay, apang si Rios naga-claim naman nga sila nga duha ang nagapanag-iya sang balay.
