Ginpahayag sang provincial director sang Negros Occidental Provincial Police Office (NOCPPO) nga wala pa napasakaan sang kaso ang nagpatay sa mag-asawa nga Fausto kag duha ka mga menor de edad nga mga bata sa ciudad sang Himamaylan sang tinalikdan nga tuig.
Suno kay Police Colonel Leo Pamittan nga wala nagakooperar sa police si Emily Fausto angut sa kaso nga pagpatay sa iya nga mga ginikanan kag utod.
Suno kay Pamittan wala pa nagagiho ang kaso angut sa pagpatay kanday Rolly kag Emelda Fausto kag ila duha ka mga kabataan sa ila puluy-an sa Sitio Kangkiling, Barangay Buenavista, Hunyo 14 nakaligad nga tuig.
Suno diri, indi cooperative si Emily sa kapulisan apang ginatinguhaan sang otoridad nga mapapirma ini sang complaint affidavit.
Gin-athag man ni Pamittan nga indi mahimo maka-file sang kaso ang mga police kun wala sang consent ang pamilya.
Madumduman nga ginatudlo sang kapulisan kag sang Philippine Army nga mga katapo sang New People’s Army ang nagpatay sa apat.
Una na nga ginpahayag ni Commission on Human Rights provincial head Vincent Parra nga nag-file na sang kaso nga grave threats kag coercion ang Himamaylan Police batok sa mga miyembro sang NPA nga gin-alegar nagpahog sa amo nga witness.
Wala man sang ideya si Pamittan kon ngaa wala nagakooperar sa ila si Emily.
