Sa kaangot nga balita, ginkalipay sang alkalde sang Murcia nga natumod kag nadakpan na ang suspetsado sa ginaalegar paghimulos kag pagpatay kay Kim Lachica nga nasapwan sa kampo sang tubo sa Hacienda Lizares, Bangga Delton, Purok Silhigan, Barangay San Miguel sang Oktubre 31, 2019.
Sa press conference ni Mayor Gerardo Rojas kahapon, nalipay ini nga naresolbar ang krimen kag nahatagan sang hustisya ang kamatayon sang bata.
Nahibaluan nga may yara sang lima ka mga persons of interest sa krimen kag lunsay ginpaidalom sa DNA examination, apang napamatud-an nga ang sperm fraction nga nakuha sa bata ang nagikan kay Gonzaga.
Nagapati si Rojas nga si Gonzaga ang suspetsado sa krimen bangud sa ebidensya nga nagapamatuod paagi sa scientific process.
Madumduman nga nangin person of interest man ang amay ni Gonzaga.
Gindayaw man ni Rojas ang Murcia Municipal Police Station sa pagpamuno ni Dejucos sa madinalaugon nga pagpatigayon sang imbestigasyon.
Suno kay Rojas, nagahatag man sila sang bulig-pinansyal kag pagkaon sa pamilya ni Lachica kag bangud may manghud ini, ginalantaw sini ang paghatag sang scholarship diri.
Gindugang man sang alkalde nga madamo sang programa ang munisipalidad tuhoy sa pagprotekta sa mga kabataan subong man sa pagpa-intra sa mga ini sa mga sports activities.
Nagalaom ini nga kun matapos na ang COVID-19, sarang na nga mabalik ang mga aktibidades nga ila ginapatigayon para sa mga kabataan.
Samtang, sa interview sang Bombo Radyo Bacolod kay Gonzaga, hugot nga ginapanginwala sini ang akusasyon batok sa iya.
Suno diri, nakahibalo ang magulang sang biktima nga yara ini sa ila puluy-an sang natabo ang insidente kag nagbulig pa ini sa pagpangita sa bata.
Ginapanindugan ni Gonzaga nga wala siya sang kahilabtanan sa paghimulos kag pagpatay sa biktima.
