Boluntaryo nga nagsungka sa Sipalay City Police Station ang suspetsado sa pagbuno-patay sa isa ka amay sadtong Mayo 24, 2020.
Sa interview sang Bombo Radyo Bacolod kay Pol. Lt. Col. Necerato Sabando, hepe sang Sipalay City Police Station, mahimo nga napanumduman ni Kimberly Albulario, 23 anyos, nga magsungka agud mapanubuan ang sentensya sini.
Samtang ginpasalamatan man ni Sabando si Albulario sa pagsalig sini sa mga pulis kag ginkuhaan naman ini sang statement kag fingerprints.
Pasakaan naman ini sang kaso sang pamilya apang sa regular basis bangud natapos na ang reglementary period of detention gani hulaton pa ang pag-isyu sang warrant of arrest agud madakop kag mabilanggo.
Madumduman nga nagkadto sang Sabado sang hapon ang biktima nga si Ramil Trinidad, 43 anyos, sa balay sang suspetsado nga si Kimberly Albulario, 23 anyos kag nagmaoy.
Suno kay Sabando, gilayon ini nga ginkadtuan sang mga opisyales kag nag-istoryahanay na ang duha sa barangay hall apang alas 11:00 sang gab-i, nagbalik si Trinidad sa balay nanday Albulario nga may dala nga kutsilyo.
Matapos sini, ginhambalan ni Albulario si Trinidad nga “may premyo ka gid bwas”.
Pagka-aga, suno kay Sabando, nagsulod ang suspetsado sa balay sang biktima kag hinali lang ini nga ginbuno.
Nakaangkon ang 43-anyos nga amay sang tatlo ka igo sa siko kag isa sa likod nga gintunaan sang iya nga kamatayon.
Nahibaluan nga samtang nagakatabo ang pagpamuno, nagavideo-call pa ang bata ni Trinidad sa iya kwarto sa iya nga iloy nga yara sa luwas sang pungsod.
