Ginabanta 15 ka mga armado nga persona ang suspetsado sa pagpatay sa isa ka negosyante sa Purok Kawayan, Barangay Bug-ang, Toboso, Negros Occidental kagab-i.
Sa interview sang Bombo Radyo Bacolod kay Police Major Jun Ray Batadlan, hepe sa Toboso Municipal Police Station, ang biktima ang ginkilala nga si Juvie Sarona, 42 anyos, pamilyado kag may-ara sang lumber business.
Suno diri sang natabo ang insidente magkaupod si Sarona kag ang tiyo sini sa kusina sang nag-abot ang mga suspetsado.
Gilayon nga ginpaarakan sang mga suspetsado si Sarona, kag siya ang nakaangkon sang igo sa ulo, dughan kag butkon nga gintunaan sang gilayon nga kamatayon.
Apang wala man gintandog sang mga suspetsado ang tiyo sini.
Suno kay Batadlan, ginsulod sang mga suspetsado tanan nga mga panimalay sa palibot apang wala man sila sang gintandog.
Matapos ang pagpatay, ginsunog man sang mga armado nga persona ang salakyan nga pick-up sang biktima nga nag-angkon sang partial damage kag ginbuka ang windshield sini.
Narecover sa crime scene ang empty shell sang nanarisari nga calibre sang armas luthang.
Gina-imbestigaran pa sa karun kun may ginkawat sa nasambitan nga puluy-an.
Suno kay Batadlan, may-ara na sila sang pangalan sang pila sa mga suspetsado apang ini ang indi pa niya mapalayag sa kahanginan bangod nagapadayun pa ang imbestigasyon.
Indi paman masiling nga rebelde nga New People’s Army (NPA) ang may kahimuan sang krimen.
Isa man sa ginatutukan nila nga motibo amo nga malapit sa mga law enforcers ang nasambitan nga negosyante.
