Nagsungka na sa Bacolod Police Station 10 ang suspek nga nagtiro sa katapo sang Philippine Army sa Purok San Roque, Barangay Handumanan, Bacolod City sang Enero 4, 2024.
Sa interview sang Bombo Radyo Bacolod kay Police Captain Lelanie Lagoting, kagab-i mga alas 9:00 ang takna sa gab-i nagsungka ang nagtiro sa army kag ini ang ginkilala kay Jeffrey Layaon, residente sang Santo Domingo, Blk 21 Lot 13, Barangay Handumanan.
Suno kay Lagoting, ginako ni Layaon nga siya ang nakatiro sa biktima bangud wala ini manamian sang pagapproach sang army.
Suno diri, gin-aligar sang suspek nga gintiro nya ang biktima bangud may dala man ini nga armas.
Ang gingamit sang suspek amo ang improvised pin gun kag may bala nga iya sang calibre 45.
Dugang pa sini nga ang bala sang pin gun ang nagmatch sa bala sa crime scene.
Ginpahayag man sini nga sang Enero 4 pagkatapos sang insidente nagpalagyo ang suspek padulhog sa Barangay Cabug kag nagpanago.
Suno sa station commander kaupod ni Layaon sa pagsungka ang iya tiya kag ang iya utod.
Antes nagsungka nagkadto ang suspek sa iya nga tiya kag nagpangayo sang bulig agud nga makasungka matapos nga ini ang may gintiro.
Ginbuligan man sang tiya kun sa diin una nga nagcoordinate sa Mobile Patrol Unit kag gindala sa Bacolod Police Station 10.
Sa karun, nakahunong na ini sa Bacolod Police Station 10 kag kun makaexecute na ini sang extrajudicial confession sa abugado, igafile nila ang kaso batok diri paagi sa regular filing.
