Naaresto na matapos ginserbehan sang warrant of arrest ang Top 1 Regional Wanted Person sang Talisay City Police Station nga amu man ang ginatudlo nga suspetsado sa pagpatay sa mag-iloy nga nagasakay sa motorsiklo sa Hacienda Ledesma, Barangay Matab-ang, Talisay City, Negros Occidental sang Marso 28 sang gab-i.
Madumduman nga napatay sanday Shirley Española, 50 anyos, kag Jason Española, 28 anyos sang sila ang gintiro samtang nagaangkasanay sa motorsiklo papauli sa ila nga balay kagab-i samtang gindala pa sa ospital ang walo ka tuig nga bata nga lalaki apang ini ang nadulaan man sang kabuhi.
Sa interview sang Bombo Radyo kay Police Major Karina Onio, deputy chief-of-police sang Talisay City Police Station, ginserbehan sang warrant of arrest sa kaso nga 3-counts of murder si Ivan Tribaco, 26-anyos, residente sang Purok Kabulakan, Brgy. Zone 10, Talisay City.
Suno kay Onio, mismo ang walo ka tuig nga bata nga lalaki ang nag-identify sa iya sa ginpakita nga mga pictures antes ini ginbawian sang kabuhi.
Nagapati si Onio nga isa lamang ka persona ang nagtiro sa mag-iloy apang posible nga may mga kaupdanan pa ini.
Suno sa iya, si Tribaco ang una na nga napriso bangud sa kaso nga paglapas sa R.A. 9165 ukon Comprehensive Dangerous Drugs Act of 2002 kag nakagwa lamang sang tinalikdan nga tuig.
Ang warrant of arrest nga ginserbe sa iya ang wala sang ginrekomendar nga pyansa para sa iya kahilwayan
Hugot naman nga nagapanginwala si Ivan Tribaco nga siya ang may kahimuan sa krimen.
Sa interview sang Bombo Radyo sa ginatudlo nga suspetsado, wala sang kamatuoran ang mga ginapato-pato batok sa iya bangud siya ang inosente kag ini ang nagapangayo man sang hustisya.
Si Tribaco ang isa ka construction worker kag suno diri, sang natabo ang krimen, papauli ini nagikan sa iya trabaho.
Suno diri, may yara sang mga CCTV footages sa lugar nga makapamatuod nga siya ang nagpauli sa ila balay sang oras nga nagluntad nga insidente.
Nagapangayo ini sang bulig bangud siya ang may nobya nga gabusong kag nagapaninguha man nga magbag-o gani kuntani indi ini pagpasibangdan.
