Magapangatubang sang kaso nga murder ang suspetsado sa pagpatay kag pag-utod sang ulo sang 58-anyos nga babaye sa Barangay Maquiling, Sagay City, Negros Occidental sang Sabado samtang wala pa na-inquest ang isa pa ka kaso sini nga frustrated murder tuhoy sa paglabo sini sa hinablos sang biktima.
Ang biktima ang ginkilala kay Gelly Recodo, laon kag residente sang Barangay Dian-ay, Escalante City samtang ang suspetsado ang ginkilala kay Randy Maniego, 35-anyos, residente man sang Barangay Dian-ay, Escalante City nga tupad lang sang Barangay Maquiling.
Santo sa imbestigasyon, may kalain sang buot si Maniego kay Recodo bangud siya ang nagasagod sang karbaw sang biktima apang sang nabaligya na ang sapat, wala ini ginhatagan sang partida nga kwarta.
Nagpadulong si Recodo kag ang iya hinablos nga si Bernalyn Abranilla sa merkado sa Barangay Maquiling agud manindahan sang ila nasugata si Maniego.
Ginlabo ni Maniego ang kaupod nanday Recodo nga lalaki apang nasagang niya ini gamit ang payong kag siya ang nakadalagan.
Ginsunod ni Maniego si Abranilla apang sa kamot lang ini naigo sang binangon kag nautod ang tatlo niya ka tudlo apang siya ang nakaluwas.
Nakadalagan pa si Recodo pasulod sa kampo sang tubo apang nalab-ot ini ni Maniego kag didto na gin-utod ang iya nga ulo gamit ang ginunting.
Ginbitbit ni Maniego ang ulo kag gindala sa sementeryo sa Barangay Maquiling nga tres kilometros ang kalayuon nagikan sa crime scene, samtang ang lawas ang iya ginbilin sa lugar sa diin ini natumba.
Naalarma ang mga pumuluyo sang ila nakita si Maniego nga may bitbit nga ulo sang babayi nga malaba ang buhok gani nagpanugid ang mga ini sa mga barangay tanod.
Sa pagresponde sang mga barangay tanod, ila nakit-an si Maniego nga nagapungko sa tupad sang krus sang katilingban sa sulod sang sementeryo samtang natungtong naman sa krus ang ulo ni Recodo.
Suno kay Maniego, wala ini sang plano nga magpalagyo gani matawhay ini nga nag-upod sa mga barangay tanod nga amo ang nagdala sa iya sa Sagay City Police Station.
Sa interview sang Bombo Radyo kay Police Lt. Col. Robert Indiape, hepe sang Sagay City Police Station, nainquest na ang kaso nga murder batok kay Maniego samtang wala pa nainquest ang igapasaka diri nga frustrated murder bangud wala pa nakarelease sang medical certificate ang doktor ni Abranilla kag ini ang nakaconfine pa.
