Priso na sa karun sa Hinobaan Municipal Police Station ang suspek sa pagutod sang ulo sang isa ka 32 anyos nga lalaki nga nasapwan sa Zone 12 Sitio Sangke Brgy. Bacuyangan banwa sang Hinobaan sang Biyernes sang aga.
Ginkilala ang biktima kay Rene Caño samtang ang suspek naman amo si Jerry Del Carmen, 26-anyos kag lunsay mga residente sang Zone 12 Sitio Sangke Brgy. Bacuyangan sa nasambit nga banwa.
Sa interview sang Bombo Radyo Bacolod kay Police Corporal Louie Sembrano, imbestigador sang Hinobaan Municipal Police Station, may nagpadulong sa police station ang magulang sang biktima agud magpahibalo sa ila nga ang ila nga utod ang nasapwan nga utod na ang ulo.
Suno kay Sembrano, ginpadulungan nila ang ginahamtangan sang bangkay malapit sa suba kag didto nahibaluan sa mga pumuluyo nga ang suspek ang kaupod man sini nga nag-inom sang Hwebes sang gab-i.
Suno sa imbestigador ginsaysay sang suspek sang ini nadakpan na sang mga kapulisan nga nagpangimon ini sa biktima bangud gin-aligar sini nga naluyag sa live-in partner sang suspek nga si Gemma Hechanova.
Suno kay Sembrano nadakpan man ang suspetsado kag nakahunong na sa Hinobaan Municipal Police Station kag natalana nga magapasaka sang kaso ang pamilya sang biktima.
Mahimo mangatubang sang kaso nga murder bangud ginbantayan sini ang biktima.
