Gin-ako sang 24-anyos nga lalaki sa Barangay Estefania, ciudad sang Bacolod nga siya ang naghimulos kag nagpatay sa pito ka tuig nga bata nga babayi sa Purok Arao sang Hwebes sang gab-i.
Sa inteview sang Bombo Radyo Bacolod kay Dexter Villa Juan, ginpahayag sini nga wala na ini sa maayo nga paminsaron sang ginhimo ang krimen bangud tuman siya kahubog.
Gin-ako man sini nga ginhimuslan niya ang pito ka tuig nga bata apang nagpanindugan ini nga tudlo lang ang gingamit niya sa biktima.
Ginpanginwala man sini nga ginlampusan niya sang bato ang bata, lain sa una niya nga ginpahayag apang gin-ako sini nga ginkuga niya ini tubtob madulaan sang ginhawa kag ginpanginwala niya man nga nakagamit ini sang ginadumilian nga ilegal nga druga.
Samtang, indi pa maestablishar sang Bacolod City Police Office nga rape ang ipasaka nga kaso apang may pasakaan na ini sang kaso nga homicide bangud napatay ang biktima.
Suno kay Police Lt. Arlyn Torrendon, pinuno sang Women and Children Protection’s Desk (WCPD), nagapadayon pa ang imbestigasyon sa kaso kag ginahulat pa ang resulta sang autopsy report sa bangkay sang biktima agud maestablishar ang sexual abuse diri.
Madumduman nga nasapwan nga patay na ang pito ka tuig nga bata nga babayi.
Nagselebrar sang kaadlawan ang pakaisa sang biktima kun sa diin nagkadto ang biktima kag ang suspetsado nga malapit man nga abyan sang ila pamilya.
Natingala ang pamilya sini nga wala nakapauli ang biktima gani ila nga ginpangita kag nasapwan ini nga wala na sang kabuhi alas-11:00 sang gab-i.
