Napahitso na sang Bacolod City Government ang swab test result sang boksidor nga si Rolan Servania kag makagwa na ini sa quarantine center.
Nahibaluan nga naka-quarantine si Servania upod ang tatlo sini ka mga miyembro sang iya team sa ETCS quarantine facility bilang kabahin sang health protocol matapos mag-abot nagikan sa Manila sadtong Oktubre 20.
Halin diri sa Bacolod, magatabok ang boksidor kag ang iya nga team padulong sa Cebu para mag-training.
Suno kay Servania, naggwa ang iya negatibo nga test result sang Sabado apang indi pa siya ma-release sa quarantine center bangud nga sala ang edad nga nabutang sa iya nga data.
Lunsay negatibo man ang resulta sang swab test sang tatlo niya ka mga kaupdanan.
Suno kay Servania, halin pa sang Sabado ang follow up niya diri agud nga makapadulong na sa Cebu. Ginkumpirmar naman ni Bacolod City administrator Em Ang nga napa-correct na ang edad ni Servania.
Suno sa iya, 1 year old ang nagagwa nga edad sang boksidor gani nga dapat mapaliwat ang test result sini nagikan sa molecular laboratory agud nga wala sang mangin problema kun kinahanglanon niya ang dokumento.
Ginpanindugan man ni Ang nga wala sila nagarelease sang pasyente nagikan sa quarantine facility nga wala naga-uyat sang original test result gani nga wala nila napagwa sang Sabado si Servania.
