Ginkumpirmar ni Executive Assistant Ernie Pineda, ang cluster head sa mga merkado sang Bacolod, nga compulsory ang pagahimuon nga pool testing sa mga market vendors sang tatlo ka dalagko nga merkado sa ciudad.
Ini ang ginalakipan sang Libertad Market, Burgos Market kag Bacolod Central Market.
Suno kay Pineda, sa meeting sini kaupod si General Melquiades Feliciano, ang deputy chief implementer for Visayas sang sang Inter-Agency Task Force (IATF), ginpahayag sang heneral nga himuon nga compulsory ang swab testing agud nga may ara sang basehan ang ciudad angot sa paglapta sang COVID-19 pandemic.
Suno diri, madamo ang mga wala nakahibalo nga infected bangod nagapabilin nga asymptomatic.
Samtang tuman naman ka damo ang bumalakal sa mga merkado gani dako ang risgo sang mga manugbaligya nga sarang naman nga malatnan kun may virus.
Ginalantaw naman nga indi masolbar ang problema kun may yara sang mga vendors nga magapamalibad sa pagpakwa sang swab.
Plano naman sini nga maghimu sang paagi agud nga pasanyugon ang ihibalo sang mga pumuluyo sa kabilidhon sang swab testing kasubong man nga wala sang dapat nga kahadlukan.
Samtang indi naman pagpahanugutan ang pagbaligya sang mga vendors nga indi magpaidalom sa RT-PCR testing.
