Kanselado ang sweeper flight subong nga adlaw bangud diutay ang pasahero nga nagpakita sang interes nga magpauli sa probinsya sang Negros Occidental.
Sa interview sang Bombo Radyo Bacolod kay Negros Occidental Provincial Administrator Atty. Rayfrando Diaz, ginpahayag sini nga nag-abiso ang manager sang Philippine Airlines nga indi madayon ang sweeper flight bangud diutay ang pasahero kag malip-ot lamang ang tinion nga mapuno ang flight gani nadesisyunan nga ang flight na lamang nga natalana sa Biyernes ang dayunon kag mahimo makasakay ang nakabook para subong.
Samtang nagdangat na sa 1,908 ka mga LSIs ang nakapauli sa probinsya gani diutay na lamang ang ginalauman nga magapauli.
Ginpahayag man sini nga madamo naman ka mga residente sang probinsya ang nakapadulong na sa Manila agud makaflight sa connecting padulong sa ginaubrahan sa luwas sang pungsod matapos ginapabalik na ang mga ini sang ila employer sa luwas.
Apang kahapon gintawgan si Diaz sang isa ka miyembro sang national IATF nga limitahan nga makasulod sa Manila ang mga naghalin sa probinsya kag dapat may yara sang ipresentar nga dokyumento gani ginhingyo lamang sini nga tugutan nga makapamanila ang nakaschedule na nga maglupad apisar nga wala sang dokyumento kaangay sang travel pass kag makacoordinate sa LGU nga kadtuan sa NCR bangud sa kakulang sang tiyempo kag nagpasugot naman ini.
Sa pihak nga bahin, ginkompirmar man ni Diaz nga ginpaidalom ang tanan nga mga pasahero nga naghalin sa iloilo nga nagpanaog sa bredco kag banago port sa swab test bangud luyag sang probinsya nga indi magkompiyansa tubtob nga wala sang magpositibo tubtob Hunyo 30 kag magaayo na sa balatian ang mga malapit nga lugar sa probinsya.
Sa tion nga wala na sang magpositibo sa ginpatigayon nga massive testing sa mga puerto, diri na magaumpisa nga ipatuman nga thermal scanning na lamang ang patigayunon sa mga pasahero apang ang tanan nga nagapakita sang sintomas ang gilayon nga dal-on sa isolation facility.
Natalana man nga magbakal sang dugang nga 20 mil nga dugang nga test kits ang probinsya.
