Ginpasalig sang Bacolod City Health Office nga subong nga semana, mabaton na sang mga midwife kag nurses nga assigned sa Bacolod City Health Office Lying-in ang ila nga sweldo para sa bulan sang Agusto.
Ini ang kasunod sang reklamo sang mga midwife kag nurses sa Bombo Radyo nga pila na ka bulan ang nakaligad apang wala gihapon ang ila nga sweldo gani nagapangutang na ang mga ini agud nga makapadayon sa pagreport sa trabaho.
Suno kay Erry Lagtapon, administrative officer V sang Bacolod City Health Office, for withdrawal na ang sweldo sang mga empleyado subong nga semana, santo sa kumpirmasyon sang City Treasurer’s Office.
Suno diri, para sa bulan sang Agusto ang sweldo nga batunon sang mga natungdan.
Ang rason sang delay suno kay Lagtapon amo ang delayed man nga pagsumiter sang iban sang mga requirements kaangay sang accomplishments kag daily time record gani naatrasar man ang pagproseso.
Suno sa iya, kun may delayed nga isa sa payroll, madelay man ang sweldo sang tanan bangud isa sila ka batch.
Ang mga nurses ang nagadamo sang 14 samtang 12 naman ang midwives kag apektado sila tanan.
Sa pagtsekyar sini sa City Treasurer’s Office, sarang na marelease ang sweldo subong nga semana bangud for withdrawal na ang budget.
Ginpasalig man sini nga mahimo sila sang tikang agud nga mapadasig ang pagrelease sang sweldo sang kaangay sang temprano nga pagpasumiter sang DTR kag iban pa nga requirements.
