Nagpatigayon ang Bacolod City Government sang Switch on Ceremony sa solar power system sang Bacolod City Government Center (BCGC) kahapon nga nagmarka sang isa ka tikang padulong sa sustainable energy solutions.
Ini ang ginpangunahan ni Bacolod City Mayor Alfredo “Albee” Benitez nga gin-updan sang representatives sang GIZ, ang technical cooperation agency sang German government nga nagasuporta sa global development initiatives.
Suno kay Benitez, ang solar project ang magasupply sang power sa 19 ka city building kalakip na ang pila ka mga barangays.
Suno sa alkalde luyag sini nga magconserve sang energy kag magpromote sang renewable energy kun sa diin ang inisyatibo ang makasave sang P1 million tubtob P1.5 million kada bulan sa electricity costs.
Ginpahayag man sang resource speaker nga unlimited source of power ang solar energy ukon ang adlaw gani dapat lamang nga ini ang gamiton.
Una naman nga gin-anunsiyar sang ciudad ang installation sang kabug-usan nga 1,340 KW nga solar power systems sa Bacolod City Government Center kag 16 ka barangays.
Ang BCGC kun sa diin nahamtang ang main government offices ang may pinakadako nga solar installation nga 400 KW.
Ang mga lugar ang ginalakipan sang Barangay Taculing nga may solar capacity nga 150-KW para sa City Disaster Reduction and Management Office kag village gym; Barangay Sum-ag nga may 140KW para sa barangay hall kag public market; Barangay Vista Alegre nga may 120KW para sa evacuation center kag youth home; Barangay Granada nga may 80KW para sa public market; kag Barangay Villamonte nga may 50KW para sa gymnasium.
