Liwat nga nagpanguna ang ciudad sang Bacolod sa may pinakamadamo nga bag-o nga kaso sang coronavirus infections sa Region 6 kahapon matapos makarekord sang 162 samtang 87 naman ang nagdugang sa Negros Occidental.
Sa COVID-19 Case Bulletin No. 174 nga ginpagwa sang Department of Health Western Visayas, 334 ka panibag-o nga kaso ang narekord sa rehiyon kun sa diin 302 ang local cases; 19 ang locally stranded individuals; 10 ang returning overseas Filipinos; isa ang authorized persons outside residence; kag duha ang for verification.
Sa 334 ka mga kaso, 162 diri ang nagikan sa Bacolod; 87 sa Negros Occidental; 73 sa Iloilo City; walo sa probinsya sang Iloilo kag apat sa Capiz.
141 naman ka mga pasyente ang nakarecover sa balatian kun sa diin 141 ang nagikan sa Bacolod; 61 sa Negros Occidental; 13 sa Iloilo; anum sa Capiz; kag tatlo sa Guimaras.
Nadugangan man sang duha ang death toll nga nagikan sa Bacolod City kag Aklan.
Sa kabug-usan, may yara na sang 8,553 ka mga kaso sang COVID-19 sa Western Visayas kun sa diin 3,673 ang aktibo; 4,752 ang nakarecover; kag 128 ang nagkalamatay.
Sa karun, ang kabug-usan nga kaso sa Bacolod ang nagdangat na sa 2,936 samtang ang kaso naman sa Negros Occidental ang nagdangat na sa 2,187.
Sa pihak nga bahin, nagpirma sang Executive Order No. 16 si Talisay City Mayor Neil Lizares nga nagaimplementar sang curfew sa ciudad sang Talisay sumugod alas 8:00 sang gab-i tubtob alas 4:00 sang kaagahon.
Ang nasambit nga executive order ang nagtake effect kahapon, Setyembre 17.
