Malapit 100, 000 ka doses pa sang bakuna ang kinahanglan nga isecure sang Bacolod City government agud nga malab-ot ang herd immunity batok sa coroanavirus.
Sa Zoom interview sang Bombo Radyo Western Visayas kay Mayor Evelio Leonardia upod ang mga gobernador sa Region 6, ang 650,000 doses sang COVID vaccine nga gin-order sang ciudad nagikan sa AstraZeneca ang makaigo sa 325,000 ka mga residente nga katumbas sang masobra 53 porsyento sang kabug-usan nga populasyon sang Bacolod.
Bangud indi man pa man sarang mabakunahan ang 18 years old and below, sakop na sini ang 88 porsyento sang kabug-usan nga populasyon.
Bangud sini, 99,000 nalang ka dose sang bakuna ang pangitaon sang city government agud mas dako nga bahin sang populasyon nga masobra 600, 000 ang mabakunahan.
Dako man nga bulig suno kay Leonardia ang donasyon nagikan sa Sinovac Biotech nga nag-abot Biyernes sang aga bangud nabuhin-buhinan ang kulang.
Ang city government ang nagpain sang P300 milyones nga pondo para sa bakuna kag nagpatunda naman ang national government nga magahatag sang vaccine.
Suno kay Leonardia, wala pa napat-ud kun sa diin magabakal sang dugang nga bakuna bangud madamo sa karon ang nagaorder nagikan sa AstraZeneca.
