Nagalaom sang syudad sang Bacolod nga mangin lain na ang pagdumala sa Yuhom Foundation sa pagpatigayon sang mga aktibidades sa palaabuton nga Masskara Festival kasunod sang pagbag-o sang presidente kag festival director.
Sa interview sang Bombo Radyo Bacolod kay Councilor Jason Villarosa, chairman sang Committee on Tourism sang Sangguniang Panlungsod sang Bacolod City, gintunga na nila sa karun ang mga obligasyon agud nga malikawan nga mga natabo sang tinalikdan nga tuig sang ginpatigayon ang Masskara Festival.
Suno kay Villarosa, sang nakaligad nga tuig ang presidente kag festival director ang isa lang kag ini amo si Atty. Pinky Mirano.
Si Atty. Mirano ang nagpasa sang iya resignation sa syudad sang nakaligad nga tatlo ka bulan bangud nangin masako na ini sa iya kaugalingon nga negosyo kag nagpractice man ini bilang isa ka abugada.
Wala man nangin rason sa resignation sini ang P6 million deficit kun sa diin nanabunan ang alkalde sang syudad.
Suno kay Villarosa, wala man nangin issue sa alkalde ang pagtabon sini sang kulang sa budget bangud nga nakita man sini ang pagsanyog sang ekonomiya, kag madamo man ang nag-enjoy.
Sa karun ang bag-o nga presidente sang Yuhom Foundation amo si Katie Matiling kag ang Festival Director amo si Jojie Dincong.
May yara naman sang Memorandum of Agreement nga pirmahan ang Yuhom Foundation kag sponsors agud nga tumanon kun ano man ang ginpledge sang mga ini kag wala na sang isulay.
Magapatigayon man ang Yuhom Foundation sang roadshow subong nga bulan agud nga magpangita sang mga sponsors.
