P200 nga utang nga wala nabayaran ang rason kun ngaa ginpatay sang trisikad driver ang tag-iya sang carinderia sa sulod sang merkado publiko sa Barangay 4, ciudad sang San Carlos sang Martes sang aga.
Sa interview sang Bombo Radyo kay Police Lt. Ruby Aurita, deputy chief sang San Carlos City Police Station, nadakpan kahapon sa banwa sang Calatrava ang suspetsado nga nagpatay kay Wilmar Sy nga si Charlou Orsajes, 36-anyos.
Si Orsajes ang tumandok gid sang Cebu kag wala ini sang permanente nga address sa ciudad sang San Carlos bangud sa trisikad lang ini masami nagatulog.
Kahapon sang hapon, nakabaton sang impormasyon ang San Carlos City Police Station nga nasiplatan si Orsajes sa isa ka balay sa banwa sang Calatrava gani naghugpong ang pwersa sang Calatrava kag San Carlos Police Station kag ginpadulungan ang lugar.
Wala naman nagbato sa mga otoridad si Orsajes.
Suno sa suspetsado, magasungka na gid man kuntani ini sa mga pulis sa bulig sang iya abyan apang nag-abot na ang otoridad.
Bangud kabahin pa ini sang hot pursuit operations, ginpriso si Orsajes sa San Carlos City Police Station base sa reglementary period of detention kag natalana nga kasuhan sang murder.
Sang ginpamangkot si Orsajes, ginpahayag sini nga may balayran si Sy sa iya nga P200 bangud wala ini nagaplete kag nagapasaan nga iya lang tingubon ang bayad.
Suno kay Orsajes, ginpahog pa siya ni Sy nga patyon kun sukton niya ini gani iya nalang gin-unahan kag gintiro sang Martes.
