Magapasaka sang kaso ang tag-iya sang Siberian Husky nga si Skittles batok sa negosyante nga nagluthang diri sang Lunes, Pebrero 20 sa Greenplains Subdivision, Bacolod City.
Sang Miyerkules, Pebrero 22, ginbawian sang kabuhi sa ospital si Skittles.
Sa interview sang Bombo Radyo kay Eduardo Libo-on, alas 4:00 sang hapon, nakagwa sa ila gate si Skittles bangud may gamay nga portion nga wala ini masiraduhan.
Nabatian na lamang sang bata sini nga may naglupok rason kun ngaa ini ang nagwa kag ginpangita ang ila ido.
Ginhakos sang bata sini si Skittles kag ginpamangkot ang mga tawo sa restaurant kun ano ang natabo kag nahibaluan nga ginpulihan ini sang mga tawo.
Gilayon nila nga gindala sa veterinarian ang ido kag nag-abiso ang doktor nga siya ang operahan bangud wala nahibaluan kun diin nagkadto ang bala.
Apang pagka-Pebrero 22 sang gab-i, ginbawian na sang kabuhi si Skittles.
Suno kay Libo-on, wala gid nagpalapit kag nagpangayo sang pasaylo si Dominador Bangero, ang negosyante nga nagluthang sa Siberian Husky.
Nagapanindugan man ini nga indi gutom si Skittles bangud ila ini ginpakaon sang aga.
Plano sini nga magpasaka sang kaso batok sa suspetsado bangud pamilya na ang ila pagkabig kay Skittles kag luyag sini nga mahatagan sang hustisya ang natabo sa iya.
