May yara na sang inisyal nga naestoryahan ang tag-iya sang Taala Farm kag ang Punong Barangay sa Barangay Cansilayan, Murcia, Negros Occidental agud nga indi na mag-agunto ang mga pumuluyo sa baho sang iti nagikan sa nasambit nga poultry farm.
Sa interview sang Bombo Radyo Bacolod kay Punong Barangay Edgar Daquipil, Barangay Chairman sang Barangay Cansilayan, Murcia, nagpatigayon sila kahapon sang technical conference sa Cansilayan Farm School kaupod ang mga manunudlo kag iban pa nga stakeholder.
Suno kay Daquipil nga kahapon man sang aga may yara man sang ginpatigayon nga conference kaupod ang nagikan sa Ta-ala kag ang Municipal Executives kasubong man ang alkalde sang banwa.
Suno diri, nangin positibo man ang resulta sang conference kag sa April 11 may yara naman sila sang patigayunon nga conference sa Cansilayan Farm School kaupod sa stakeholder kag suno sa pamunuan sang Taala didto nila ipresentar ang ila mga bag-o nga remedial measures agud nga madula ang pagpanimaho sang iti sa nasambit nga lugar.
Pila naman kaadlaw nga wala na sang nagapanimaho nga iti sa lugar apang luyag sang Punong Barangay nga may yara sang concrete measures nga ipresentar ang management sang Poultry Farm nga indi na magbalik ang problema sa mabaho nga iti nagikan sa nasambit nga poutry farm.
Ginpahayag man nga wala na sang baho sang iti ang suba sa pila na kaadlaw bangud ginclean-up naman ini sang tinalikdan.
